സോഷ്യൽ മീഡിയ ഇൻഫ്ലുവൻസർ തൊപ്പി എന്നറിയപ്പെടുന്ന നിഹാദിനെതിരെ പൊലീസ് അന്വേഷണം കൂടുതൽ ശക്തമാക്കി. സുഹൃത്തുക്കളുടെ സ്വകാര്യ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിച്ചെന്ന കേസിലാണ് നിഹാദിനെതിരെ ലുക്ക് ഔട്ട് സർകുലർ പുറപ്പെടുവിച്ചത്. വിദേശത്തേക്ക് കടക്കാൻ സാധ്യതയുണ്ടെന്ന വിലയിരുത്തലിനെ തുടർന്നാണ് നടപടി.ചോദ്യം ചെയ്യലിന് ഹാജരാകാൻ നോട്ടീസ് നൽകിയിരുന്നെങ്കിലും ആരോഗ്യപ്രശ്നങ്ങൾ ചൂണ്ടിക്കാട്ടി മറുപടി നൽകിയ ശേഷം നിഹാദ് ഒളിവിലായെന്നാണ് അന്വേഷണ സംഘം വ്യക്തമാക്കുന്നത്. ഇതിനിടെ, പൊലീസ് റിപ്പോർട്ടിന്റെ അടിസ്ഥാനത്തിൽ നിഹാദിന്റെ യൂട്യൂബ് ചാനലും നീക്കം ചെയ്തിരുന്നു.
ആലുവ റൂറൽ സൈബർ പൊലീസിന്റെ നേതൃത്വത്തിലാണ് കേസ് അന്വേഷണം പുരോഗമിക്കുന്നത്. മുൻകൂർ ജാമ്യാപേക്ഷയ്ക്ക് എതിരായ റിപ്പോർട്ടിൽ കേസിലെ ആരോപണങ്ങൾ ഗുരുതര സ്വഭാവമുള്ളതാണെന്നും ജാമ്യം അനുവദിക്കരുതെന്നും പൊലീസ് കോടതിയെ അറിയിച്ചിട്ടുണ്ട്.അതേസമയം, നിഹാദിന്റെ മുൻ സുഹൃത്തുക്കളും സംഘാംഗങ്ങളുമായിരുന്ന ചിലർ അദ്ദേഹത്തിനെതിരെ ലഹരി ഉപയോഗം, ലൈംഗിക ചൂഷണം, പ്രായപൂർത്തിയാകാത്തവരുമായി ബന്ധപ്പെട്ട ഗുരുതര ആരോപണങ്ങൾ ഉന്നയിച്ചിട്ടുണ്ട്. എന്നാൽ ഈ ആരോപണങ്ങളിൽ അന്വേഷണം തുടരുകയാണ്.
മറ്റൊരു കേസിൽ, തൊപ്പിയുടെ സംഘത്തിലുണ്ടായിരുന്ന മുഹമ്മദ് എന്ന മമ്മുവിനെ സ്ത്രീത്വത്തെ അപമാനിക്കുന്ന തരത്തിലുള്ള പരാമർശങ്ങൾ നടത്തിയെന്ന പരാതിയിൽ മഞ്ചേരി പൊലീസ് അറസ്റ്റ് ചെയ്തിരുന്നു. യൂട്യൂബ് ലൈവ് സ്ട്രീമിനിടെ നടത്തിയ പരാമർശങ്ങളുമായി ബന്ധപ്പെട്ടാണ് നടപടി. ഈ കേസിൽ തൊപ്പി ഉൾപ്പെടെ മറ്റ് പ്രതികൾക്കെതിരെയും അന്വേഷണം പുരോഗമിക്കുകയാണ്. നിഹാദിനും സഹപ്രവർത്തകർക്കുമെതിരായ വിവിധ പരാതികൾ നിലവിലുള്ള സാഹചര്യത്തിൽ വരും ദിവസങ്ങളിൽ അന്വേഷണത്തിൽ കൂടുതൽ നിർണായക നടപടികൾ ഉണ്ടായേക്കുമെന്നാണ് സൂചന.
About The Author
